ni Bert Cabual

ng London, United Kingdom

---

PASINTABI

Hinihiling ko pong ako ay tulutang
magsaysay ng aking mga pinagdanan;
sa dukha kong nayon mula nang lumisan,
hanggang sa pagsipot ng kasalukuyan.

Di man makalugod ay baka sakaling
may pagkaing-isip na maitatangi;
na sa ibang lupa’y sa pamamalagi,
may mangisa-ngisang aral na mapili.
 
Nagtungo sa London: ako nga ba’y sino,
mapangarapin man ay dukhang katoto;
mapagkikilalang ako’y Pilipino
sa pananalita’t tatag ng prinsipyo.

Tangi sa hangaring aliwin ang diwa
ng kababayan kong nangingibang-lupa;
mithi ring ang tatak ng sariling wika
nating Pilipino’y maipabandila.

May ilang pangalan ng lugar at dako
na sa pagsasaysay ay kusang binago;
at gayon din naman may ngalan ng tao,
dito’y pinalitan sa likod ng kwento.

Ang dahila’y upang mapangalagaan
ang puri ng mga walang kinalaman;
layon naming walang pusong masugatan
ng mga tulaing sa babasa’y alay.

Hindi ko gagawing totoong mahaba
ang pasakalye kong magpugay ang nasa;
itong kasaysaya’y sisimulang kusa—
pamamaalam kong natigmak ng luha!