Sali Ka - Belen 'Bheng' Arellano: Sa Harap ng Puntod

THANKS TO OUR SPONSORS

Huling pagbabago: Nobyembre 23, 2008

SALI KA, KABAYAN

Mula sa panulat ni

BHENG ARELLANO

London, United Kingdom

SA HARAP NG PUNTOD

Nalugmok sa dusa’t libong pagkabagot,
katawan mong dati’y masigla’t malusog;
sa nangaglipanang ganid at balakyot,
kristal na puso mo’y nagkadurug-durog;
mutya ng Silangan, Inang maka-Diyos
binubusabos ka ng lipi mo’t hinlog!

Sayang ang simula’t hirap na ginugol
na magda-magdamag at magha-maghapon;
sayang ang pagharap sa sigwa’t daluyong—
ang puhunang dusa’t buhay na nalipol;
ang paninindigang sa laya’y nagbangon,
ngayon ay bilanggo ng buktot na layon!

Mga pakunwaring pagmamalasakit
ngayo’y naglipana sa iyong paligid;
nagpipintasan pa’t sabuyan ng putik,
gayong sila-sila ay lihim na ganid;
hudas at pilatong kunwa’y maka-langit
ay nangagpipiging sa iyong pagtangis!

Taksil na anak mo’y nag-aasal-ulol,
nagsasa-buwaya’t nagsasa-simaron!
Bakit ba banidad ng panahon ngayong
kislap ng salapi’y pinapanginoon?
ang sikmurang bundat ng may sibang misyon
ay gasgas na puntod ng bangkay mong nasyon!

Alindog mo’t yumi’y nawalang-halaga
nang salaulain ng tusong pagsinta;
may batik-Kanluran ang Silangang-ganda
nang sa dukhang kubo’y mapalungayngay ka…
(Tinatanuran ko ang iyong lapida—
Sa paniniwalang mabubuhay ka pa!)

Mga katha ni Bheng Arellano na matatagpuan sa sayt na ito
Tula: Lihim | Sa Harap ng Puntod | May Paninindigang Di Maaapula
Balagtasan: Dagdag na taon sa Haiskul
Sanaysay: Budhing Inaanay | Bakit Kailangang Dagdagan ng Isa Pang Taon ang Haiskul sa Filipinas
Maikling Kuwento: Subyang sa Puso

SALI KA NA RIN, KABAYAN!

Site menu:

THANKS TO OUR SPONSORS

BHENG ARELLANO