Sali Ka, Bert Cabual - Kaluluwa ng Lahing Marangal

THANKS TO OUR SPONSORS

SALI KA, KABAYAN

Mula sa panulat ni

BERT CABUAL

London, United Kingdom

KALULUWA NG LAHING MARANGAL
(Para sa Buwan ng Pambansang Wika)

HULOG ni Bathala na may halimuyak
ang wagas mong puso’t diwang binusilak;
maaring gawin kang talim na matalas
ng isang bayaning sandata’y panulat;
katambal-suyo ka ng aming watawat,
ikaw ay daigdig, buhay, at pangarap.

Sa pagkaalipi’y nahango ang bayan,
nang iyong gisingi’t mag-alab ang tapang;
sa kislap at talim ng mga kampilan,
nakilalang kami’y kidlat sa Silangan;
sa pakikibaka’y nang iyong damayan,
ang mithing paglaya’y aming nasilayan.

Ang nalilikha mo’y lamyos ng sonata
na himig-kundimang dalit ng pag-asa;
ikaw ang tulain sa sintang dalaga
ng isang makatang puso’y nagayuma;
napatatamis mo ang pait ng dusa,
ang dapithapon ma’y napauumaga.

Maging sa pag-ibig ay ikaw ang hari,
sa pinid na puso’y ginagawang susi;
napaiibig mo ang ayaw magtangi,
at naparorosas yaong dalamhati;
ang talinghaga mo’y hindi mapapawi
sa puso ng mutyang minsa’y bigay-bawi.

Ikaw’y kaluluwa ng lahing marangal,
dakila ang pusong sa iyo’y magmahal…
(Ang bayang sa wika ay hiwa-hiwalay,
marupok na lipi’t bulag ang pananaw;
ang wikang sarili’y kapag itinanghal,
aanihi’y tuwa’t ga-mundong tagumpay!)

Mga katha ni Bert Cabual na matatagpuan sa sayt na ito
Tula: Ang Makata at ang Alak | Kamanyang Kay Manny Pacquiao | Si Quezon at ang Wika | Soneto kay Paeng | Noynoy: Asin at Ilaw | Kaluluwa ng Lahing Marangal | Maligayang Pasko
Kwentula: Bugso ng Gunita
Balagtasan: Bata at Pamalo | Si Manny Pacquiao at ang Politika | Dagdag na taon sa Haiskul
Sanaysay: Saltik-Panitik: Balagtasan
Maikling Kuwento: Ang Dasalan ni Belen | Isang Libo't Isang Halik | May Lihim ang Bahay-bahayan | Mayo at Disyembre | Si Mang Estong

SALI KA NA RIN, KABAYAN!

Site menu:

THANKS TO OUR SPONSORS

BERT CABUAL