TUNGKOL
SA SAYT NA ITO
Nagpalitan pa kami ng ilang mga biro…at natapos ang pag-uusap naming yaon ni Cristy. Nagpaalaman kami.
NAGSALIMBAYAN sa guniguni ko ang pakikipag-usap sa akin ni Jhobeth at ang pakikipag-usap ko kay Cristy. Tinimbang-timbang ko ang mga detalye ng kani-kanilang sinabi at ang katotohanan ng kanilang damdamin sa isa’t isa. Oo, mga bata pa sila nguni’t matured ang kanilang mga pangangatuwiran. Gustong-gusto kong makatulong sa aking mga eskuela sa kanilang suliranin. Tantiya ko, kung maging magkasintahan man sila kahi’t mga bata pa, ay hindi yaon makaaapekto sa kanilang pag-aaral. Kapuwa sila matalino at nangunguna sa mga aralin. Matataas din ang kanilang mga grado. Kung mag-ibigan man, hindi yaon makapipinsala, bagkus magiging inspirasyon pa nga nila habang sila’y nag-aaral. Nagpasiya ako: tutulungan ko sila! Nguni’t hindi ko sasabihin kay Jhobeth na may gusto pala sa kanya si Cristy. Hindi ko ibibisto ang magandang dalaginding. Mag-iisip ako ng ibang paraan.
“Jhobeth, bakit hindi ka pa magtapat kay Cristy?” tanong ko.
“Hindi ko nga po kaya, Sir, at nasabi ko na po sa inyo ang dahilan nang una tayong mag-usap,” sagot ni Jhobeth
“Naniniwala ka ba sa anting-anting?”
“Opo naman, Sir. Meron nga pong anting-anting si Lolo…kaya n’yang buhatin ang tatlong kabang palay nang sabay-sabay. May sa-kalabaw raw po siya.”
“Bakit n’yo po naitanong?”
“‘Lam mo, may anting-anting din ako, pero hindi anting-anting sa-kalabaw…anting-anting ito sa-babae!”
“Talaga po, Sir?” biglang kumislap ang kanyang mga mata.
“Matutulungan ka ng anting-anting ko…gusto mo?”
“Gustong-gusto ko po, Sir. Pero paano po ako matutulungan ng anting-anting n’yo?”
“Kung gagamitin natin ang anting-anting ko, puede ka nang magtapat ng pag-ibig kay Cristy. At pag nakapagtapat ka, walang mintis na sasagutin ka niya ng ‘Oo.’
“Tunay po, Sir?”
“Tunay na tunay. Basta magtiwala ka lang sa akin at gawin mo ang ipagagawa ko sa iyo.”
“Sige po, Sir. Gagawin ko po ang ipagagawa n’yo, makamtan ko lang ang pag-ibig ni Cristy.” Naglulundag sa tuwa si Jhobeth.
Mga tula at iba pang kathang handog sa OFWs: Bayani at biktima sa sariling bansa at sa ibayong dagat.
ni Bert Cabual